正在內地舉行巡唱嘅Eason日前於大連舉行「Fear And Dreams世界巡迴演唱會」，而太太徐濠縈都有同行。行程雖然緊密，但Eason都抽時間同老婆浪漫一番，趁開騷前夕同老婆拍拖睇日落，佢更加罕有發文放閃：「嗯⋯⋯聽說大連很浪漫！完。」Eason第一張相係獨照，拉向後就見到佢同太太甜蜜凝望，兩個都笑得勁冧；另一張Eason就扮矮，「小鳥依人」倚傍喺老婆肩膊上，甜到糖尿！
夕陽無限好，一就唔曬，一曬就超驚喜，Eason多年來都好少放閃光彈，因此唔少網民都好大反應，紛紛留言：「戴返副超先！閃到盲喇！」。而有「分享症」嘅阿徐都有post孖老公睇日落嘅何照，平日都係阿徐post多，兩夫妻罕有齊齊放閃！
陳奕迅同徐濠縈2006年結婚，二人多年來都冇好多緋聞，雖然冇成日掛喺口邊，但其實好恩愛，經常被網民捕獲拍拖撐枱腳，仲會一齊做運動，穩定關係可以話係relationship goal！而現時女兒康堤都大個女開始拍拖，相信可以有更多時間享受二人世界了。
- 徐濠縈分享症踢爆囡囡康堤戀情 19歲亭亭玉立帶日籍男模見家長
发表评论