近日鄔友小紅書分享與汪明荃、黎明、郭富城、張智霖及鄭伊健等紅星多年前嘅合照，不過竟然有網民無啦啦留言問起佢當年嘅三角戀：「點解唔揀李明慧揀咗翁嘉穗？」你敢問我敢答，估唔到不到鄔友正竟然正面回覆：「緣份天注定，冇得揀！」網民都大讚佢EQ高，連八卦新聞都肯回應，鄔友正續指：「最大的誤傳，就是我追過袁詠儀同佘詩曼！實情是我從來沒有追過袁詠儀和佘詩曼，咁多年都是啞仔食黃連。」
有網民提起佘詩曼係佢太太翁嘉穗同屆港姐季軍，叫佢邀請佘詩曼代言，鄔友正即回應指對方已代言其他品牌：「其實佘詩曼第一個廣告，是拍海馬牌枕頭！只係我唔夠眼光，冇同佢再續約！」鄔友正貼地回覆，令到大家都覺得好驚喜，掀起熱烈討論。
翁嘉穗1997年參選港姐，除了是冠軍，更囊括「最上鏡小姐」、「東方美態大獎」、「都會魅力小姐」，但當選後不久閃嫁大佢廿年嘅富商鄔友正。鄔友正旗下公司以往一直係港姐贊助商之一，當年有傳翁嘉穗與李明慧參選期間一直情同姊妹，1998年李明慧公開表示與鄔友正剛開始拍拖，且將會在數月後結婚，有意與TVB解約。但不足一個月，鄔友正就被傳媒影到與同屆冠軍翁嘉穗約會，翁嘉穗更指自己才是男方的正印女友，二人拍拖已接近半年。三人關係撲朔迷離，最後鄔友正出面承認翁嘉穗的女友身份，兩人於1999年在美國拉斯維加斯完婚，婚後育有兩子。
其實翁嘉穗曾受訪講到當年呢段「三角關係」，佢明言自己唔係「狐狸精」：「我同鄔先生都係單身，而且發生感情都比『一啲人』早，由拍拖到分開，由分開到重新走埋一齊，只係復合。」翁嘉穗表示參選港姐時已有男朋友，但當時年紀尚小，唔知自己想要咩，與舊男友認識後覺得有feel就自然一齊；不過舊男友接受唔到佢名氣上嘅改變，佢自己亦因為參選港姐，見識多咗成熟咗，雙方距離愈來愈遠。翁嘉穗當時未能於鄔友正與其男友之間作選擇，鄔友正決定離她而去，而翁嘉穗真決心分手後，再與鄔友正聯絡，但鄔友正已與李明慧拍拖，鄔友正明確知道自己最愛翁嘉穗，就作出決定，更將責任攬上身：「我今次錯嘅係我，選擇時唔夠當機立斷，唔明白感情並唔能夠抱住可憐人嘅心態處理，呢件事我要負上部分責任，佢為我受到咁大的傷害同損失，依然無怨無悔，我不能不感動。」
當年「多出來的人」李明慧神隱十幾年，近年回流嘅佢2018年曾出席公開活動，與世無爭嘅佢表示已經唔係好慣對鏡頭，不過都仍然keep得好好。而原來李明慧2003年經已嫁人，老公係已故教育家名人陳樹渠兒子陳燿陽，李明慧仲為對方生咗對龍鳳胎，如今一對仔女已經17歲，家庭美滿相當幸福。
圖片來源：Instagram
发表评论