鄧永健近日在社交平台分享影片，片中的他向大家介紹一家內地的港式冰室，原來他榮升做老闆，跟兄弟杜大偉一齊做生意大展拳腳。鄧永健接受本網電話訪問，他表示：「呢幾年除咗拍戲之外，一直都想搵啲嘢投資或者做吓小生意，不過香港始終成本比較高，咁啱有個契機，杜大偉本身搞開生意同飲食業，佢同拍檔喺江門搞港式冰室，咁我就嘗試參與吓！衝出香港，睇吓會唔會有一番新景象。」
冰室選址在江門蓬江區啟明里，屬江門主力發展的旅遊區，食正2023年人氣劇集《狂飆》熱潮，曾經在當地取景拍攝的街道都成為旅客的打卡熱點，帶旺整個區域，鄧永健指冰室命名為「握飲握食」，內部設計亦充滿港式味道，有類近港鐵指示牌、當舖燈牌、曾灶財字畫等等，當然亦有鄧永健和杜大偉的招牌「TVB」Logo，他說：「成個設計將香港味道同情懷帶到江門，希望當地人都感受到，設計係大家傾出嚟，杜大偉個飲食團隊一向合作開，有一班人長駐打理，我哋平日喺香港開工，主要都係靠網上溝通，有時開會都係視像。唔使開工嘅日子，我同杜大偉都會北上，去舖頭亮吓相，都幾多人認得我哋，有啲人嗌我《愛回家》Ivan個名，不過最搞笑係有人仲叫我Gary，《同事三分親》、《畢打自己人》同《天天天晴》都已經係10幾年前嘅劇集，大家竟然都仲記得，好多謝大家支持我哋。」
鄧永健透露今次整項投資達七位數字人民幣，「我只係佔好少股份，打理都唔需要我去搞，主力做宣傳，嚟緊我同杜大偉都會喺線上線下拍片宣傳，開咗個幾兩個月，而家生意都唔錯幾好。」早前，鄭家生、馮素波、陳榮峻夫婦、歐瑞偉等都有到他們冰室試食，他表示希望往後都可以招呼更多同事來嘗試一下他們的奶茶咖啡，「上面好多港式餐廳，始終味道仲係有少少唔同，我哋希望做到將由細飲到大既味道，畀大家都感受到。」
发表评论