方力申睇溫布頓最平門票8萬大元 集郵超Nice荷里活巨星乘機示愛

方力申去到現場非常興奮，仲自拍story同大家現在分享，佢表示：「聽講呢個飛係網球史上最貴，成一萬蚊美金一張決賽嘅飛，最平呀！最平都一萬蚊美金！」佢仲講笑話要喺現場「炒黃牛」添，之後佢就去到場外睇球手練習，機會難能可貴！

不過最勁嘅都係佢成功集郵荷里活巨星湯告魯斯（Tom Cruise），變成小粉絲嘅佢分享自己同湯告魯斯嘅自拍，大讚對方好好人，好友善，不過就賣個關子話遲下先分享同對方嘅故事。之後佢再「炫耀」同湯告魯斯嘅影片，表示：「我哋仲傾咗幾次偈添。」片中小方連續同對方示愛：「I love you so much.I love you so much.」佢仲搭對方膊頭，而湯告魯斯就握拳輕搥佢胃嘅位置，就好似打緊招呼「Bro」咁，二人睇落非常老友！

已經62歲嘅湯告魯斯冇filter之下有少少皺紋，不過男友人味極濃，可以同呢個等級嘅巨星傾偈，真係可遇不可求，唔少人都好羨慕小方！湯告魯斯仲為佢喺溫布頓場刊上簽名，更寫上小方英文全名，真係足以做家傳之寶呀！除咗湯告魯斯之外，小方仲集郵到亞洲天王周杰倫，今次呢個旅程除咗睇到精彩賽事，仲見到咁多猛人，真正滿載而歸！