反起跑線聯盟2丨34歲練美娟演師奶被讚敬業增肥 自揭脹爆背後原因：呢度講真話

娟姐於《反起跑線聯盟2》比起上集更加脹，做師奶仔真係令人好有代入感，唔少人都以為佢係為角色增肥，不過日前娟姐就自爆：「見到有留言話我為咗做羅師奶增肥，聽講threads呢度係講真話嘅地方，所以都想老老實實講番聲，冇特登增嘅，不過都冇特別keep囉。依家有努力做番運動，瘦番個碼㗎喇。」

34歲嘅娟姐7年前先正式入行，身形一向圓潤嘅佢曾被公司要求減磅改形象，不過娟姐堅持己見，表示自己瘦咗就冇晒個人特色，所以拒絕公司要求。不過娟姐為自己健康，都不會暴飲暴食，就好似今次咁，見到太超過都會keep番，而維持魔鬼身材，唔係依賴節食，而係靠積極做運動修身。

娟姐畢業後做過電影、娛樂、廣告公司，直到ViuTV節目《Girl’s talk》的監製向她招手。對於27歲先入行追夢，佢表示有夢就要去追，寧願做不好留有遺憾，都勝過咩都冇做而後悔。