東張西望丨何沛珈內蒙古外景急購「面堅尼」 結果出晒事靚樣慘變「鍾無艷」

何沛珈跟陳懿德都是新晉女主持，保養靚樣自然是最重要的事，所以在內蒙古拍攝期間，她們都完全沒有介意造型，戴「面堅尼」遮太陽，以免變「黑炭頭」，沒想到何沛珈回港後始揭原來拍攝時暴曬出晒事，她在IG分享「高炒」自拍照，驚現上額出現鴛鴦膚色的情況，慘成「鍾無艷」。何沛珈接受本網電話訪問，她笑言：「防曬我已經係瘋狂搽，我本身喺香港買咗『面堅尼』，但係唔記得帶去，然後去到嗰邊見到太陽猛烈就立即『美團』（內地外賣APP），我仲幫德德買咗個，又出動太陽遮，不過有時興奮起上嚟都唔記得拎。返到嚟香港，我老竇已經話阿女黑咗，所以我已經立即訂咗美白飲、美白cream同美白精華，三管齊下。」

雖然過程中病倒又曬到變「鍾無艷」，但何沛珈認為今次行程絕對難得可貴。「今次呢個出trip嘅活動，令我最大嘅感受係...如果我唔係因為拍攝嘅話，我應該都唔會有機會去到內蒙古咁特別嘅地方。因為我哋係由城市呼和浩特去正藍旗大草原要坐成七個鐘頭車，然後而家內蒙古嘅天氣溫差都幾大，日頭可以去到36度，有一日喺車度見到個測試溫度竟然去到40度，然後晚上溫度可以跌到得番10幾度。呢一個旅程我覺得係好難忘嘅，因為內蒙古族人佢哋嘅純樸熱情，佢哋對每一個人嘅嗰種好，係平時好難見到，然後你睇到嘅風景、睇到嘅大自然面貌，我覺得去完之後心靈得到平靜，今次仲去咗騎馬、射箭、博克（蒙古三技），仲做咗好多以前從來未做過嘅嘢。」